Romans 12

Mua Maneka baliwep ookowa-ke

1Aria emar unowik, ni feenap oneka akena naep nia maakiyem. Mua Maneka ni manek akena nia kemalep nia saliwak. Naapeya ni anane o kema suuwap niena mia niam wuami patirowa saarik areka. Naap maemi niena kema kaalal-afurap o uuwowa uuwomaka. Ni naap onami lotu makena oniman. Mua Maneka sira naap nain niar kookaliya. 2Ne miiw sira-sira ookowa kemaiw ikeman nain iiwawun piipu-afureka. Ne Mua Maneka ona sira enuma niem-ikaiya nain, nain kema manekiw ikeka. Naap ikok Mua Maneka maa mauwa onowa nia kookaliya nain akimap ookami paayarowen, sira eliwa ne sira kakeniw eena o kookaliya nain.

Mua Maneka amisa yieya uuwomiyen

3Aria Mua Maneka ona kookalowa-pa yo uuwowa fain efa asipeya ni unowiya nia maakiyem, ni unuma niam purupemi me niam maeka, “Yo amis maneka, sira eliwa efar ikua.” Weetak, naap me maeka. Mua Maneka eena nia asipeya opora wiar opiwkin kekanowa ne uuwowa niek nain kema suuwami pepekiw niam maeka. 4Naeya fain kema suuwikua. I mia-na kuisow muuta, nain ara muutitik unowa, ne uuwowa ononer wiar ikua. 5Sira naapiw, i mua unowiya Krais teeria-pa wiar ikemik nain epaskun mia iriniya kuisow saarik ikemik. I yiam teekap-puowa-ko me ikua, epaskun maneka ikemik.

6Mua Maneka ona kookalep i mua kui-kuisow amisa yieya uuwowa ononer onimik. Naapeya i uuwowa nain kakeniw wiar faomowa-ke ikua. Feenap, Mua Maneka mua oko opora kema iweya mainon, “Opora nain Mua Maneka-ke yiek.” Naap maemi opora ariman wia maakinon. 7Ne Mua Maneka mua oko i Yeesus Krais teeria wia naapowa uuwowa iwinok-na o uuwowa nain opam-ikainok. Ne Mua Maneka opora suule wiowa uuwowa iwinok-na somek mua arep uuwam-ikainok. 8Ne Mua Maneka teeria-pa baliwep ikowa nain wia kekanowowa uuwowa, nain mua oko iwinok-na neek wia kekanowam-ikainok. Wi mua maa marew ikemik nain wia naapowa, nain mua oko kema iwinok-na baliwep wia naapam-ikainok. Ne mua oko woos mua wuinok-na o Yeesus Krais ona teeria baliwep wia urufam-ikainok. Ne wi mua wia kemalep wia asipowa nain, mua oko kema iwinok-na o pasirirow marew palanowiw wia asipam-ikainok.

I Yeesus teeria epaskun baliwep yiam saliwiyen

9Aria mua wia kookalowa nain maken akena wia kookaleka. Neemi sira unowa feenap oneka, sira samora onowa miatin-afurap sira eliwa ookiman nain naap opap koonoweka. 10I Krais teeria epaskun ikemik naep yiena yiamun epia-ke naemi niam saliweka. Ne ni ekima niam opaka, opora me niam fieneka. Naap onowa nain nena kiikir one. 11Ni me lebumareka, Mua Maneka uuwowa kema manekiw ikok palanowiw ikeka. 12Mua Maneka eena opora maek nain makena-ke wiar naep kema nain manekiw ikok kema eliwiw ikeka. Ne pina kamenap niar imenariya nain pun ni kema sonomiw ikeka. Neemi Mua Maneka farowa nain me piipueka, anane naap farem-ikeka. 13Ne Yeesus Krais teeria mua papako maa-ko iiwariwkin-na wia naapeka. Ne owow oko mua-ko niar kereriwkin-na wia tetareka.

14Wi mua nia samorimik nain Mua Maneka fariwkin kema eliwa wiinok. Ne nis pun wia saliweka, sarinemi murarow opora me wia oneka. 15Wi kemelam-ikaimik nain wiamiya kemeleka. Ne wi kema fufurarep omomimik nain pun wiamiya omomeka. 16Ni unowiya kema epaskun ikeka. Oko-ke iikirami yo yaisow naemi me wame pirinok. Yo mua amisa-ke me wame mainok. Naep yo taar teekow mua-ke naemi uuwam-ikainok.

17Aria mua oko sira samora nia onuk-na muuna me wia urureka, sira eliwa wia ofakoweka. Naeya mua unowa nia urufap mauk, “Aa, sira nain eliwa-ke,” naap maikuan. 18Wiena nia iiwuaruk-na wiena maa-ke. Ni saria opow sira-pa ikeka.

19Emar unowik, muuna ururowa sira nain neek ikainok. Nain Mua Maneka ona maa-ke, ikoka os-ke sirirowa wiinok. Moram o opora maek nain wiar siisimep-puamik, nain feenap,

“Mua sira samora nefa oniya nain yena maa-ke, ikoka yena nain kiripinen.”
(Lo 32.35)

20Me wia samoreka, ne ni Mua Maneka opora maek nain ookami oneka, feenap,

“Nena iiwua mua-ko wuaileya-na farep maa onake. Ne kema enekareya-na eka dabela onake. Moram no naap oninan-na eena sira samora nefa onak nain onaiw emina ururinon.”
(Sindaun 25.21-22)

21Naapeya mua oko sira samora neek nefa oninok. Nain no sira eliwa-pa pikiwemi sira samora nain iiwawun wiar ifemakeya sira eliwa-ke manekarem-ikainok.